It Nijs vraagt: hoe Fries is het Fries Museum?

(tekst: website It Nijs)

Frysk museum ek Fryskfreonlik?

moandei 22 july 2013

Yn it ferline wienen der geregeld klachten oer de posysje fan de Fryske taal by it Frysk museum. Lykwols, mei it nije museum soe alles goedkomme, sa is tasein oan Provinsjale Steaten fan Fryslân by it beskikber stellen fan it miljoenesubsydzje. It gebou is no sawat klear en oer in lytse twa moanne wurdt it iepene. Reden foar de redaksje fan ItNijs om te fernimmen hoe’t de flagge der by hinget. De redaksje hat yn in e-mail nei de direksje fernommen nei de stân fan saken. De mail is hjirûnder yntegraal werjûn. Sadree’t de reaksje ynkommen is sille wy dêr wer oer publisearje.

Achte direksje, bêste minsken,

 
wy hawwe begrepen dat PS (Provinsjale Steaten) by it fêststellen fan it subsydzje foar it nij Frysk museum besletten hawwe dat it Frysk en it Nederlânsk yn de kommunikaasje-uteringen in folslein gelykweardich plak krije soenen.
 
Omdat it museum oer in lytse 2 moanne iepengiet binne wy benijd nei de stân fan saken by it realisearjen fan dat belied.
 
Yn ferbân dêrmei hawwe wy in oantal fragen:
1. Op dit stuit binne jim parseberjochten noch allinnich yn it Nederlânsk, ek nei adressanten dy’t it leaver yn it Frysk hawwe wolle. Mei yngong fan watfoar datum wurde dy berjochten dûbeldtalich, dat wol sizze yn it Frysk en yn it Nederlânsk?
2. Op de webside www.friesmuseum.nl binne op himsels al aardich wat teksten yn it Frysk. Lykwols it Frysk hat no wol in dúdlik achtersteld plak. Yn it foarste plak begjint de thússide (‘home’) mei de Nederlânsktalige ferzje en moatte je alle kearen foar de Frysktalige saken nei rjochtsboppe (Frysk oanklikke). Wêrom net earst begjinne mei de taalkar (en dêrnei de ynhâld) sadat jo prate oer in folslein gelykweardige posysje?
Op dyselde webside komme op de thússide in oantal ‘skowende panielen’ foarby mei de lêste ynformaasje oer útstallings en wat it museum fan doel is. Foar safier’t wy it besjen kinne, binne dy panielen allinnich yn it Nederlânsk beskikber. It liket ús in lytse muoite, ek wat kosten oangiet, om dy teksten ek yn it Frysk sjen te litten.
3. Wy binne benijd hoe’t de beweiwizering en de teksten by de tentoanstellings yn it FM der aansens út komme te sjen. Yndachtich de beslútfoarming fan de provinsje kin it neffens ús net oars wêze of dat opskriften, beweiwizering en folders/brosjueres allegear yn minimaal 3 talen (Frysk, Nederlânsk, Ingelsk) beskikber binne en dat al dy ynformaasje yn elke taal gelykweardich is kwa nivo en ynhâld.
4. Hieltyd mear kommunisearje organisaasjes en bedriuwen fia nije en sosjale media. Tink oan Twitter, apps, digitale nijsbrieven en spesifyk foar it FM apparatuer foar rûnliedings yn it museum sels ensfh. Wat sil it Frysk museum dwaan om ek dêr foar in gelykweardige posysje fan it Frysk en it Nederlânsk te soargjen?
 
Yn’t foar tank foar jim reaksje,
 
mei freonlike groetnis,
 
 
redaksje It Nijs www.itnijs.nl