Johannes Kramer: As dy sa lilk binne, dan moat jo dêr nei harkje. Net om se gelyk te jaan, mar om tiid te keapjen en sa oer en wer begrip te krijen

Foto: Biologische boerderij Louwsmar

(tekst: FNP-gedeputeerde Johannes Kramer op Facebook)

Ik ha eefkes net sa aktyf op Facebook west, omt ik wat oare drokten oan de holle hie. It hat foar my en ús gesin efkfes ino bannige tiid west.

Dat begrûn fansels mei de boere aksje op freed 11 oktober. Der wie in protte krityk mar ek in protte lof foar myn optreden en hanneljen. Benammen al dy positive reaksjes jûgen my it betrouwen dat ik it goed dien hie. Tige tige tank derfoar. As minsken sa lilk binne, oer alles wat der oer harren hinne komt, dan moat je as bestjoerder efkes in time out mei inoar nimme. De angel moast der út en de dialooch oposocht wurde. Dat benammen bûten Fryslân dat beskôge waard as bûgjen, is dan mar sa. Ik sit net op myn plak om blyn regels troch te drukken, mar ik sit der foar de minsken en as dy sa lilk binne, dan moat jo dêr nei harkje. Net om se gelyk te jaan, mar om tiid te keapjen en sa oer en wer begrip en fan dêr út draachflak te krijen foar nije besluten. It stikstofprobleem moat fansels wol oplost wurde.

De wike dêrnei giene de boereprotesten fierder. Earst by de oare provinsjes en letter wer yn Den Haach. Yn Grins sels mei geweld. Dat is net goed. Ik meitsje my bot soargen om de lilkens en it fertriet by ús boeren. Ik fernim te min omtinken foar de ‘emoasjonele’ kant fan it boereferhaal. It gebrek oan perspektyf is frustrearjend. Ik fernim fragen as: Wannear komt der no ris in ein oan al dy regeltsjebrij? Wannear witte wy no einliks ris wêr’t wy oan ta binne?
Dêrom wie it goed dat ús Kening freed in pear hoedene, mar waarme wurden foar ús boeren brûkte. No soe it goed wêze as ek it kabinet sichtber yn petear mei de boeren giet.

Woansdei hie ik in spoeddebat yn de Steaten. Dat wie fansels spannend, mar dat gie hiel goed. Ik fernaam dat ús ferhaal begrepen en ferstien waard. It moaiste momint foar my wie doe’t in tal jonge boeren op de tribune spontaan hun hân opstutsen en ek tsjin de moasjes fan treurnis stimden. Ek de lokwinsken fan ferskate steateleden nei it debat, benammen ek fan opposysje fraksjes, diene my goed.

En doe kaam dyselde woansdeitejûns it berjocht dat de gemeenteried fan Noardeast Fryslân my foardrage sil foar it boargemastersskip fan dy gemeente. Nei in roerige wike en in spannende dei in hiel moai momint foar my en Christina Rypkema, mar ek foar ús gesin, myn âlden en de partij. De betrouwenskommisje kaam noch deselde jûns del en wy hawwe hiel gesellich mei inoar sitten. Wy fiele ús o sa wolkom.

Ik krych de wereld oan appkes, mailtsjes en telefoantsjes. It hûs tilt op fan de blommen.

No begjint in perioade fan weromsjen én foarútsjen. Ik ha in ferskriklik moaie perioade as deputearre. Mei fijne kollega’s, in baas-kommissaris en fruchtbere gearwurking mei koalysje én opposysje fraksjes. Moaie dingen belibbe en dien. Hawar, no begjint stadichoan it nije aventuer. It is ús doel om yn de simmerfakânsje te ferhúzjen sa dat de bern earst it skoaljier hjir ôfmeitsje kinne.

Ik sjoch der nei út om mei kolleezje, ried, amtners en mienskip fan Noardeast-Fryslân in gemeente del te setten dy der ta docht!