Is het kleinschalige evenement een melkkoe van de gemeente geworden?

Foto: Liwwadders

(tekst: FNP)

Skriftlike fragen oangeande kosten en fergunningoanfraach
organisearjen lytsskalige eveneminten binnen gemeente Ljouwert
fan FNP Ljouwert oan it kolleezje fan boargemaster en wethâlders
sa as bedoeld yn artikel 42, earste lid fan it reglemint fan oarder
fan de gemeenteried fan Ljouwert.

Achte kolleezjeleden,

Yn reaksje op it nijs dat de Vaderdagbraderie yn Stiens troch te hege kosten net trochgean
kin en it feit dat gemeente Noardeast-Fryslân in subsydzje ynfierd om de totale kosten foar
doarpsfeesten nei beneden by te stellen, stelle wy as FNP Ljouwert ûndersteande fragen:

1. Regeljouwing en fergunningoanfragen foar in doarpsfeest of in lytsskalich evenemint
as in braderie hoege net gelyk te wêzen. Wolle jimme ûndersykje oft de regeljouwing
yn de fergunningoanfraach foar lytsskalige eveneminten ek soepeler kin?

2. Soe by him werheljende eveneminten (jierliks weromkommende eveneminten) de
hichte fan de fergunningoanfraach net nei beneden bysteld wurde kinne?

3. Soe by him werheljende eveneminten de omfang fan de fergunningoanfraach ek
beheind wurde kinne?

4. It soargjen foar foldwaande ferkearsfeiligens troch in ferplichte eksterne partij kostet
sa’n €1000,-. Is it kolleezje it mei ús iens dat by repetearjende, lytsskalige
eveneminten sa as braderieën de opdracht ‘Zorg voor afdoende
verkeersmaatregelen’ foldwaande is?

(Boarne Omrop Fryslân, sjoch fierderop foar de folsleine link)
Doarpen en stêden yn de gemeente Noardeast-Fryslân kinne tenei maksimaal 1.500 euro
subsydzje krije foar it organisearjen fan it doarpsfeest. Organisatoaren hawwe te krijen hân
mei oprinnende kosten. De subsydzje is bedoeld om dêr tsjinwicht oan te bieden.
It ynhieren fan EHBO’ers, ferkearsregelers en it hieren fan ôffalkonteners binne de ôfrûne tiid
hieltyd djoerder wurden. It kolleezje fan de gemeente Noardeast-Fryslân is benaud dat
feestkommisjes troch de finansjele risiko’s hielendal gjin feesten mear doare te
organisearjen.

5. Is it kolleezje it mei ús iens dat in spesjale subsydzje yn it libben roppe om de kosten
(mei) fanút de gemeente te beheinen foarkaam wurde kin troch nó oare keuzes te
meitsjen?

Yn ôfwachtsjen fan de antwurden fan it kolleezje, oerwaget FNP Ljouwert in moasje yn te
tsjinjen om binnen gemeente Ljouwert in subsydzjeregeling foar doarpsfeesten en
eveneminten yn it libben te roppen om foar dizze organisaasjes dizze oanbelangjende kosten
leger te krijen.

Wy sjogge jimme antwurden graach ferskinen,
mei hertlike groetnisse,

FNP Ljouwert | Janneke de Boer