FNP noemt faciliteren Pathé door gemeente kwalijk

(tekst: brief FNP naar Leeuwarder bioscoopexploitanten)

Achte frou Osinga, achte hearen Hakbijl, Bosma en Van den Bergh,

Yn réaksje op jim skriuwen, it folgjende:

De FNP, as politike partij, kin him yn grutte linen fine yn jim opmerkings oer de Pathé-kwestje. Wy hawwe ús yn de Ljouwerter gemeenteried dan ek sterk makke foar de besteande Ljouwerter bioskopen. De FNP is fan betinken dat der gjin spake is fan sûne konkurrinsje at der in multinational (Pathé) tsjinoer in lokale holding (Loren) stiet. It liket op Goliath tsjinoer David; de ferhâldings binne út balâns!

Wy hawwe pleite foar de mearwearde fan it lokale ûndernimmerskip en de betsjutting dêrfan foar de leefberens fan de Ljouwerter binnenstêd. Ek hat de FNP fragen steld oer it ferlern gean fan arbeidsplakken en oare feiten oer de wurkgelegenheid by de bioskopen boppe wetter helle.

Wat wy boppenal kwealik fine is de fasilitearring fan gemeentewege om in grutte konkurrint fan bûtenôf, binnen te heljen. Dit, wylts wy as gemeente oan de oare kant alle war dogge om de binnenstêd, mei help fan lokale ûndernimmers, te fersterkjen!

Spitigernôch wienen wy as iennige partij tige kritysk yn de ferskate gearkomsten. Ús fraksje fan twa minsken hat tsjin de plannen fan Pathé stimd; in grutte mearderheid fan de gemeenteried wie foarstanner. It gefolch sil dus wêze dat de Pathé-plannen gewoan trochgean sille at der fierder gjin nije feiten mear op tafel komme.

Wy winskje jim in protte súkses ta yn de fierdere striid tsjin dizze ûnsillige plannen en steane iepen foar neier oerlis.
Út namme fan de FNP-Ljouwert,

Auke Kleefstra

fraksje-assistint