Elske Schotanus: Wat in fergriem fan enerzjy, meidwaan oan soksoarte wedstriidsjes

(tekst: Elske Schotanus op Facebook)

De ien seit: bist te kritysk. De oar: se ha leaver jongeren. Of: sitst net yn de netwurken.

Yn myn plan sit in behoarlik tal oeren. Ferbjustere wie ik dan ek doe’t ik, in dei nei de deadline fan Tresoar oer de mail te hearren krige dat de skriuwer dy’t yn it ramt fan Oare Wurden acht wiken nei Dublin gean sil, net nei Dublin giet mar nei in gat, te fergelykjen mei Moddergat, trijehûndert kilometer fan de stêd Dublin. Briefke oer skreaun, kopytsje nei de baas, frege om it nei de sjuery troch te dwaan en neat op werom heard. En fansels hast it dêr mei oaren wolris oer. Immen murk op: Dat in sjuery oan sok foar de gek hâlden meiwurkje wol.

Stekst der tiid yn, in soad tiid ek: yn it skriuwplan, yn watst oan aktiviteiten fierder noch dwaan wolst, yn it sykjen nei ynformaasje oer organisaasjes, eveneminten, minsken dy’tst yn Dublin treffe wolle soest, dêr’st yn de sin fan nevenaktiviteiten wat mei kins en wolst, yn it bywurkjen fan it CV. Mar altyd is der in orizjineler plan, in bettere skriuwer, in nijsgjirriger cv.

Ik mei dit hjir allegear net melde, teminste, dat is it fersyk, want pas moarn / woansdei de alfde giet der fanút Tresoar wei in parseberjocht de doar út en wurdt bekend wa’t nei Ierlân giet. Mar wa bin ik geheimhâlding ferskuldige? Ik bin gewoan slim teloarsteld. Fersin dy net: ik gun it in oar. Boppedat, ik wie net nei de Ierske wjergader fan Moddergat ta gien. It plak fan ferbliuw, 2000 ynwenners, fier fan alles, dêr is in “bilingual Arts Centre” en dêr leit, neffens de kalinder, de boel by ’t simmer sa’n bytsje stil. En it festival dêr’t de skriuwer sa leuk optrede kinne soe, dat hat in webside mei sokke teksten: ワキの臭い対策ラボ＠あなたのワキの臭いの悩みを解決します ワキの臭いが気になるあなたへ. It is gewoan Dublin net.

Wat in fergriem fan enerzjy, meidwaan oan soksoarte wedstriidsjes. Foar my wie it dan ek de lêste kear. Mei in plan dêr’t neat geheim oan is.

Lees hier meer