Dach fan ut Stadsfrys wurdt it in tige fleurige middei

8 oktober 2018 Actueel

Foto: A. Keikes

(tekst: persbericht)

Giet oer: Dach fan ut Stadsfrys (sneon 3 novimber)

Achte hear/mefrou,

Ien fan de talen fan Fryslân is it Stadsfrys, dat – mei lytse ûnderlinge ferskillen – praat wurdt yn de stêden Ljouwert, Boalsert, Harns, Frjentsjer, Snits, Starum en Dokkum. Hoe moai oft it Stadsfrys ek is, it buorket stadichoan efterút. Der binne lykwols noch genôch mooglikheden om nije Schwung yn it Stadsfrys te krijen. Om dy mooglikheden te ferkennen en de skouders ûnder it Stadsfrys te setten, wurdt de “Dach fan ut Stadsfrys” organisearre, op sneon 3 novimber yn Frjentsjer.

De Dach sil bestean út trije parten. Moarns is, yn it stedhûs, in sympoasium foar amtners en taalprofesjonals/taalwittenskippers. Dêrby is it de bedoeling dat we inoar fuorje: amtners krije kennis en tips om ek yn har eigen stêd it Stadsfrys te befoarderjen, en wittenskippers krije lokale yngongen om bygelyks ûndersyk opsette te kinnen. De kennis en kontakten dy’t by it sympoasium opdien wurde, binne dêrmei foar alle oanskowers nuttich. We komme fierder mei it Stadsfrys as wittenskip en belied mei-inoar oparbeidzje en ideeën útwikselje.

Nei in tuskenprogram wêrby’t, nei in beskieden lunchbuffet, mei in Stadsfryse gids in stedskuier troch Frjentsjer makke wurde kin, is dan middeis, yn de Martinitsjerke, it publyksdiel: in indoor minyfestival foar it Stadsfrys. Dêr sil it bredere publyk op boartlike wize it Stadsfrys ‘fiere’ kinne. Mei muzyk, foardrachten, petearkes, taalspultsjes en de oanbieding fan it nije boek Sprookjes fan Grimm in ut Stadsfrys oan Kommissaris fan de Kening Arno Brok, wurdt it in tige fleurige middei.

De Dach wurdt troch in protte partijen droegen (sjoch it program) en is ek frij ambisjeus yn syn opset: noch net earder is it Stadsfrys op dizze skaal ûnder it omtinken fan sawol publyk as saakkundigen brocht. Hooplik is de Dach dan ek in nije oantrún foar it Stadsfrys – want wat help kin it wier wol brûke. Foar de organisaasje fan de Dach soe finansjele stipe oars noch tige wolkom wêze. Om de mooglikheden te besprekken kinne jo kontakt sykje mei Anne Popkema (06-25427548).

Yn de taheakke fine jo it program, dat hielendal fergees is. Jo kinne fansels ek allinne it moarnssymposium besykje; wol fersykje wy jo om jo foar it sympoasium / lunch net letter as 19 oktober op te jaan, fia info@taalburopopkema.nl. Mochten jo fierder noch fragen ha, dan beäntwurdzje wy dy fansels graach. Wy hoopje op in grutte opkomst, sawol moarns as middeis!

Mei freonlike groetnis,
Anne Tjerk Popkema, Peter van der Meer en Pieter Duijff

Program

Datum: sneon 3 novimber
Lokaasje: Frjentsjer (stedhûs en Martinitsjerke)
Inisjatyf en koördinaasje: Anne Popkema, taalburopopkema.nl, info@taalburopopkema.nl, 06-25427548 Partners: Fryske Akademy, Leeuwarder Courant, Nederlandse Taalunie, RuG (Minorities&Multilingualism / Frysk), gemeente Waadhoeke, Provinsje Fryslân, KH2018/Lân fan Taal, Stichting Trezoor Franeker, Vrienden van de Stad Franeker, Genoatskap foar ut behoud fan ut Franekers.

****************

Sympoasium (stedhûs Frjentsjer)
10.00 Ynrin mei kofje
10.15 Iepening deifoarsitter
10.20 Wurd fan wolkom (wethâlder Dijkstra fan gemeente Waadhoeke)

10.30 Skiednis Stadsfrys (prof. dr. Arjen Versloot, UvA)

10.50 Aktuele stân fan saken Stads (dr. Reitze Jonkman, NHL Stenden hegeskoalle)

11.10 skoft
11.30 Stadsfrys by jongerein (drs. Pieter Duijff, FA)
11.50 Stadsfrys op social media (drs. Lysbeth Jongbloed, FA) 12.10 Neipetear

Tuskenprogram
12.30-13.15 Lunch
13.15-14.00 Stadsfryse stedskuier

Publyksdiel
It publyksdiel begjint om 14.00 oere yn de Martinitsjerke en duorret oant sawat 17.00 oere. It krijt it karakter fan in indoor minyfestival. De sprekstalmaster fan tsjinst is Asing Walthaus (Leeuwarder Courant), dy’t rûn rint oer it ‘festivalterrein yn de tsjerke en lofts en rjochts koarte petearkes oangiet mei de oanwêzigen. Geandewei de middei sille yn alle gefallen oan bod komme: wethâlder Dijkstra oer it Stadsfrys yn de nije gemeente Waadhoeke, in Stadsfryse kwis, Lysbeth Jongbloed-Faber (Fryske Akademy) oer Stadsfrys en social media, it taalspul Stimmen fan Fryslân (Ryksuniversiteit Grins), bekendmakking fan de winner fan de Stadsfryse oersetwedstryd (LC fan 18 maaie 2018), foarlêzen fan in Stadsfrys sprookje, en it oanbieden fan it earste eksimplaar Sprookjes fan Grimm in ut Stadsfrys oan KfdK Arno Brok, dy’t dizze Dach tige stipet. Tusken de ûnderdielen troch sil it duo Bauke van der Woude & Campbell Forbes in pear kear Stadsfryse lieten hearre litte.

foto: André Keikes