Tryater komt mei teaterfestival It Brust

Link van de week:

Geldkompas Leeuwarden

Cultuur

Tryater komt mei teaterfestival It Brust

Tryater komt mei teaterfestival It Brûst

Fan 25 febrewaris oant en mei 25 april 2010 strykt Tryater del op njoggen lokaasjes yn de provinsje mei it festival It Brûst. It is foar ‘t earst dat Tryater séls in festival organisearret. We steane meardere dagen op ien lokaasje mei foarstellingen én in râneprogramma foar alle generaasjes fan in mienskip. Makkum, It Hearrenfean, Boalsert, De Gordyk, Akkrum, Ljouwert, Frjentsjer, Balk en Drachten binne de lokaasjes foar dizze earste edysje fan It Brûst. Makkum hat de premiêre fan it festival en de foarpremiêres fan de foarstellingen. De foarstellingen geane op sneon 6 maart op It Hearrenfean yn premiêre.

Meardere foarstellingen op ien plak
It Brûst omfettet trije nije Tryaterfoarstellingen: Dixi foar beukers, MOOF troch Jong Tryater en Diplodocus Deks foar folwoeksenen. De foarstellingen binne makke troch, mei en foar jong en âld, Frysktalich, Nêderlânsktalich en/of ynternasjonaal. It Brûst is foar alle leeftiden, ferfent teaterbesiker, mar ek foar dyjinge dy’t de stap nei it teater noch net setten ha.

Râneprogramma
Neist de foarstellingen is der in râneprogramma. Der binne ynliedingen, foar- en neipetearen troch de teatermakkers, bern kinne sûkerspinnen meitsje of dûnsje op Silent Disco, de Brûstband Barry Nice and the Nice Guys makket der feest fan, Tom Lanoye komt yn eigen persoan, der rydt boppedat in bus nei Amsterdam foar ‘Woest’ in oar stik fan Lanoye, der kin iten wurde, de Brûst-bar is iepen, Nynke Laverman probearret nije dingen út en de Freonen goaie harren op in Tryaterkwizz. En der is noch mear: op 17 febrewaris ferskynt de It Brûst-programmakrante mei dêryn it komplete oersjoch fan de programmearing. In grut part fan de oplage ferskynt as bylage by de Leeuwarder Courant.
Diplodocus Deks
De jonge Flaamske regisseur Sarah Moeremans (1979) (Productiehuis Rotterdam, MTV Extreem, Blind Date – foarhinne Serie Nieuwe Theatermakers) hat har fêstbiten yn Diplodocus Deks, in teatertekst fan har lângenoat Tom Lanoye, ien fan de meast populaire Flaamske skriuwers fan it momint. It stik, oer de fynst fan in prehistoaryske kaakbonke en wat dat betsjut foar in doarpsmienskip (lês: de ien rûkt jild, de oar wol har lân net ferkeapje), is komysk en werkenber. It wurdt fan achter nei foaren spile, as wie it in archeologyske rekonstruksje. Sarah wurket foar dizze produksje mei akteurs út it ensemble fan Tryater (Marijke Geertsma en Aly Bruinsma) en mei gastspilers (Alyt Damstra, Hilbert Dijkstra, Thijs Feenstra, Hans Kroodsma, Mirjam Stolwijk (NNT, NT, searje Wilhelmina), Joop Wittermans en Koen Wouterse (NNT, searje Waltz). Rients Gratama tekene foar de oersetting. De foarstelling wurdt op inkele jûnen Nederlânsk boventitele.

MOOF
Ensemblespiler en regisseur Eelco Venema makket mei de spilers fan Jong Tryater, it
‘belofteteam’ fan it selsskip, in dynamyske foarstelling oer de ûndergong fan in idoal,
frij nei Oedipus fan Sophokles. Haadpersoan MOOF is in jongkeardel yn ‘e krêft fan syn libben. Hy hat it makke, is hot en hat it mei syn heldendieden sels ta kening skopt. Mar as syn stêd pleage wurdt troch hingjongeren, Meksikaanske gryp en Q-koartsgeiten, rekkent it folk mear as op oait op syn held. Kin hy de flok opheffe en syn eigen needlot keare? En doart er de wierheid ûnder eagen te sjen? Jong Tryater bestiet út Romke Gabe Draaijer (Iepenloftspul Jorwert), Karel Hermans, Froukje de Jong, Marijn Korver, Ytsje van der Meulen, Brecht Wassenaar (11Stêdetocht) en Theo Smedes (11Stêdetocht, PeerGroup). De foarstelling is twatalich, de oersetting is fan Romke Toering.

Dixi 4+
Doe’t Tamara Schoppert by de bernefoarstelling Wurd Socht, dy’t Tryater yn 2008 spile, seach hoefolle bern der ûnder de foarstelling nei de WC moasten, en hoe’t kollega-regisseur Jellie Schippers dêr hâlden en kearen mei hie, wie it idee foar Dixi berne. Dixi giet oer wachtsjen en pisjen, en pisjen en wachtsjen. Beukers wachtsje wat ôf, wylst tiid harren noch neat seit. Bestiet wachtsjen eins wol foar beukers? Mei Dixi stiet de tiid even stil. It wachtsjen bestiet net mear. Akteurs Servaes Nelissen (Firma Rieks Swarte, Orkater, Theatergroep Max, Toneelgroep Oostpool) en Arnold Dijkstra (út it ensemble fan Tryater) besykje der mei de beukers fet op te krijen. Se binne ûnbefongen, somtiden wat nayf, sels in bytsje clownesk. Se fine gjin wissichheden, mar sjogge wol in protte mooglikheden. Dêrmei rekket de foarstelling ek oan Samuel Beckett’s Wachten op Godot, dat neist de situaasje by Wurd Socht in ynspiraasjeboarne foar dit stik west hat. Peter Sijbenga soarge foar tekstadvys en muzyk en ferskes dy’t kletterje as dyn plas. De foarstelling is twatalich.

Kaartferkeap
Kaarten foar It Brûst binne te keap by de fiif dielnimmende skouboargen, de lokale foarferkeapadressen yn de oare plakken dêr’t It Brûst delstrykt en op de eigen website fan Tryater.

Datum: Maandag, 22 Februari 2010

Meer Cultuur...