Johannes Kramer: verbod Fries in Post Plaza herinnert aan Franco
(tekst: weblog Johannes Kramer, voorzitter FNP statenfractie)
Frysk by Marktplaats en Post Plaza
Plak foar it Frysk by Markplaats en Post Plaza
Woe earst Marktplaats al gjin Frysk mear hawwe. No wol ek in Hotel yn Ljouwert it Frysk keare. Sa geane wy dochs net mear om mei ús Twadde Rykstaal, dochs?
Wat Marktplaats oanbelanget is harren flintertinne argumint dat men net goed kontroleare kin wat der skreaun wurdt yn it Frysk. Dat is fansels absolute flauwekul. Lit ús earlik wêze, yn de praktyk blykt dat ek net Friezen it Frysk aardich folgje kinne. En by de Marktplaats meiwurkers sit fêst wol immen dy't it Frysk - by benadering - lêze kin. Oars binne der ek noch altyd wurdboeken. En boppedat, om hoefolle advertinsjes soe it gean op jierbasis? Frysk op Marktplaats is dus feitlik gjin probleem en dat Marktplaats der al in probleem fan makket seit wat oer har ûnbegryp en leechachtsjende hâlding foar Frysktalige minsken oer. Ik hoop dat de Ried fan de Fryske Beweging syn foarnimmen om hjir in proefproses oer te begjinnen trochset. Us Pytsje hat ûnderwilens der al in moai skoft in Frysktalige advertinsje op stean en okkerdeis frege Marktplaats har oft se him ek ferlinge woe! Marktplaats is net inkeld dom, mar ek inkonsekwint.
Lit Marktplaats dan in non-probleem opblaast hawwe, Hotel Post Plaza yn Ljouwert is fan in oar kaliber. Dêr wol men it Frysk tusken it personiel ferbiede. Dat raast oan de protters. Jo eigen taal prate kinne is in minskerjocht. Dat docht jin tinken oan de tiiden fan Franco, dy't it Baskysk en it Katalaansk net hearre woe, en Saddam Hoessein dy't gjin Koerdysk oan de earen ferneare koe. Mar dôchs net yn ús eigen Haadstêd, yn 2009?
De gasten meie gjin Frysk hearre hat it management ferordinearre. Tink der om, it giet hjir net om de hurdkûter dy't as personielslid dôfhûdich Frysk trochpraten bliuwt tsjin in Amerikaanske of Spaanske toerist (want dat docht nimmen), mar om in pear meiwurkers dy't menoander yn it foarbygean yn it Frysk efkes tasprekke. Mar as it argumint dat brûkt wurdt troch de eigner fan it Hotel konsekwint is, dan wurdt der ek gjin Nederlânsk mear praat as der Dútske, Arabyske of Sinees gasten by binne. Mar dat is net sa. De provinsje hat in foarbyldfunksje as it giet om it hoedzjen en noedzjen fan it Frysk yn it maatskiplik ferkear. De provinsje moat dus, sa lang as dizze ûnsinnige regel troch it management útdroegen wurdt, gjin kongressen of oernachtings mear yn dat Hotel of besibbe bedriuwen hâlde of boeke.
Tusken al dit negative nijs troch ek posityf nijs oer it Frysk. Lolke Folkertsma, ús AB lid fan it Wetterskip, hat foar inoar krigen dat it Wetterskip no ek snapt dat de Algemiene Wet Bestjoersrjocht ek foar harren fan tapassing is en dat alles wat yn it Frysk sein wurdt yn it Algemien Bestjoer ek sa opskreaun wurdt. Bravo Lolke!
Datum: Maandag, 16 Maart 2009
|
